Ek Din...

tez bhaagti zindagi se,
thoda thehar jaane ko,
dil ud chala fursat se,
ek din yunhi jee jaane ko...

kuch teri sun ne ki,
kuch apni kehne ki baari aayi,
ab tak jo aah chuppi thi,
us tanhayi ko mitaane aayi,
khawaishein jo yakeen bani,
badli, bigadi phir bani,
atak ke kabhi, kabhi sarak ke,
jaisi bhi guzri zindagi,
kuch pal unhi hasraton ka,
mazza ab uthane ko,
dil ud chala fursat se,
ek din yunhi jee jaane ko...

kacche pakke chajje par,
taaron ki chaddar aude,
bante bunte raat bhar,
kisse woh naye purane,
subah ki pehli kiran jab,
jagaane aayi phir hass kar,
muh dhak kar sote rahe,
dhup ko sirhane rakh kar,
naa kahin pahunchne ko,
naa hi kuch khone-paane ko,
dil ud chala fursat se,
ek din yunhi jee jaane ko...

kati patang ki dor jab,
lapet kar phir ki tayyar,
josh aur junoon se,
koshish ki humne har baar,
hawa ke bhi rukh ne tab,
yun naa maani haar,
le aayi chura apne saath,
kaale kaale baadal hazaar,
baarish ka paani baras pada,
lo kagaz ki naav tairaane ko,
dil ud chala fursat se,
ek din, bas ek din yunhi jee jaane ko...