Har taraf motor chalti hai, apne chalne ki jagah nahin,
Baarish toh bahut girti hai, par peene ko kuch raha nahin,
Line hi line hai har jagah lagi, ticket toh kabhi mila nahin,
Paper mein hum pass ho liye, par naukri ka kuch pata nahin,
Phir bhi chehre par smile chipka ke, kehte tabiyat changi hai,
Tangi hai bhai tangi hai, dil dariya apna aur haalat nangi hai
Kahin nakhre hazaar kar khane mein bhi karte kanjoosi hain,
Chalte phirte sapne kharidte, neeyat apni nahin bharti hai,
Kahin do waqt ka jugaad kar, nahin hoti zaroorat poori hai,
Khali jeb mein haath daale, hasti zindagi adhoori hai,
Kabhi dil ka hisaab toh kabhi khawaish apni mehangi hai,
Tangi hai bhai tangi hai, dil dariya apna aur haalat nangi hai
Majhab-Dharm ke naam par, bewajah lad jaane ki,
Kiski ho zameen aur kiska aasmaa, lakeer khinche batware ki,
Ladka-ladki mein farak karte, soch hai puraane zamane ki,
Jaat-paat, bhed-bhav ke maslon se, aazaad desh ko dubane ki,
Dimaag toh diya khuda ne, par jab soch hi apni bhangi hain,
Tangi hai bhai tangi hai, dil dariya apna aur haalat nangi hai
No comments:
Post a Comment